អបអរសាទរ ឆ្នាំថ្មី ឆ្នាំសាកល ឆ្នាំ២០១៤!

Sunday, June 2, 2013

និស្សិត​ក្រីក្រ​ក៏​មាន​ឱកាស​​ក្លាយ​ជា​អ្នក​ជំនាញ​ IT ពិត​ប្រាកដ​ដែរ Trackback

ជាមួយ ​ចក្ខុវិស័យ​ដ៏​វែង​ឆ្ងាយ ក្នុង​ការ​ជំរុញ​ឲ្យ​សិស្ស​និស្សិត​ក្រីក្រ​នៅ​ជនបទ​ដាច់​ស្រយាល​​ដែល​ ចូលចិត្ត​និង​ចាប់​អារម្មណ៍​​មុខ​ជំនាញ​ព័ត៌មានវិទ្យា អង្គការ  Passerelles Numériques Cambodia (PN) ដែល​ប្ដូរ​ឈ្មោះ​ពី CIST គឺ​ជា​ស្ថាប័ន​បណ្តុះ​បណ្តាល​ដ៏​សំខាន់មួយ​នៅ​ប្រទេស​កម្ពុជា ដែល​ទទួល​បណ្តុះបណ្តាល​មុខ​ជំនាញ​ព័ត៌មានវិទ្យា ​ដល់​​និស្សិត​ក្រីក្រ​កម្ពុជា​រាប់​រយ​នាក់​ក្នុង​មួយ​ឆ្នាំ​ៗ​ តាម​រយៈ​ការ​ផ្តល់​អាហារូបករណ៍​សិក្សា​ដោយ​ឥត​គិត​ថ្លៃ។
កញ្ញា Nimol Sahak បុគ្គលិក​ទំនាក់ទំនង​ការ​សិក្សា​របស់​អង្គការ PN បាន​ឲ្យ​ដឹង​ថា ក្នុង​មួយ​ឆ្នាំៗ PN តែង​តែ​ផ្តល់​អាហារូបករណ៍​ដល់​និស្សិត​ក្រី​ក្រ​កម្ពុជា​រាប់​រយ​នាក់ មក​តាម​បណ្តា​ខេ​ត្ត​នានាឲ្យ​ទទួល​ការ​អប់រំ​ជំនាញ​ព័ត៌មានវិទ្យា​​ដោយ​ឥត​ បង់​ថ្លៃ​ពី​អង្គការ។ ការ​បណ្ដុះបណ្ដាល​នេះ​មិន​តម្រូវ​ឲ្យ​មាន​ការ​បង់​ថ្លៃ​នោះ​ទេ គឺ​រាល់​ការ​ចំណាយ​ទាំង​អស់​ជា​បន្ទុក​ និង​ការ​ទទួល​ខុស​ត្រូវ​របស់​អង្គការ​ផ្ទាល់​ ក្នុង​នោះ​រួម​មាន​ការ​ស្នាក់​នៅ ការ​ហូបចុក និង​សម្ភារៈ​ឧបទេស​សិក្សា​ដទៃ​ទៀត។
យ៉ាង ​ណា​ កញ្ញា​ថា មុន​ដែល​សិស្ស​ក្រី​ក្រ​ទាំង​នោះ​អាច​ទទួល​បាន​សិក្សា​​ទាំង​នេះ គឺ​ត្រូវ​ឆ្លង​កាត់​ការ​ធ្វើ​តេស្ត និង​សម្ភាសន៍​ប្រកប​ដោយ​តម្លាភាព និង​ម៉ត់ចត់​បំផុត​ដើម្បី​ស្វែងរក​និស្សិត​ដែល​ក្រីក្រ និង​ខ្វះ​លទ្ធភាព​ពិត​ប្រាកដ​​​។
“គោល​ ការណ៍​អង្គការ​គឺ​ព្យាយាម​ធ្វើ​យ៉ាង​ណា ឲ្យ​និស្សិត​ចេញ​ពី​ត្រកូល​អ្នក​ក្រខ្សត់​ទាំង​នេះ មាន​ជំនាញ​ច្បាស់​លាស់ ​ចេះ​ធ្វើ​ការ​ប្រកប​ដោយ​គុណភាព។ ហេតុ​ដូច្នេះ​ហើយ បាន​ជា​កៅអី​អាហារូបករណ៍​ដល់​និស្សិត​ទាំង​នោះ ត្រូវ​ឆ្លង​កាត់​ការ​ប្រឡង​ ​សមត្ថភាព​ពួក​គេ​ជា​ច្រើន​ដំណាក់​កាល​ ជា​ពិសេស​គឺ​ស្ថានភាព​ជាក់​ស្ដែង​ដែល​ពួក​គេ​កំពុង​រស់​នៅ”​។
បន្ថែម ​ពី​នេះ ​និស្សិត​ជា​​នារី​ត្រូវ​បាន​លើក​ទឹកចិត្ត​តាម​រយៈ​ការ​កំណត់​ឲ្យ​​មាន​ ចំនួន ២​ ភាគ ៣ នៃ​ចំនួន​សរុប​វគ្គ​សិក្សា​ក្នុង​ឆ្នាំ​នីមួយៗ។
ក្រៅ ​ពី​សិក្សា​លើ​មុខ​​ជំនាញ​ដែល​មាន​ស្រាប់ អង្គការ​ក៏​មាន​វគ្គ​បណ្ដុះបណ្ដាល​ភាសា​អង់គ្លេស និង​វគ្គ​ខ្លីៗ​មួយ​ចំនួន​ទៀត​ពាក់​ព័ន្ធ​នឹង​អាកប្បកិរិយា​នៅ​កន្លែង​ធ្វើ​ ការ ក៏​ដូច​ជា​នៅ​ក្នុង​សង្គម​ផង​ដែរ ដើម្បី​ឲ្យ​ពួក​គេ​ទទួល​បាន​នូវ​អ្វី​​ដែល​ជា​តម្រូវ​ការ​ទី​ផ្សារ​ការងារ​ បច្ចុប្បន្ន។
លទ្ធផល​ ជាក់​ស្ដែង​របស់ ​PN បាន​ទទួល​ការ​ចាប់​អារម្មណ៍​យ៉ាង​ខ្លាំង​​ពី​អង្គការ​ក្រៅ​រដ្ឋាភិបាល លើ​គោល​ដៅ​បណ្តុះ​បណ្តាល​ដែល​អង្គការមួយ​នេះ បាន​កំណត់​និង​ផ្តោត​លើ​​និស្សិត​ក្រីក្រ​។ ជាក់​ស្ដែង កាល​ពី​ពេល​ថ្មីៗ​នេះ លោក Martin Hirsch ប្រធាន​ភ្នាក់ងារ​សេវាកម្ម​របស់​ប្រជាពលរដ្ឋ​បារាំង​បាន​ធ្វើ​ដំណើរ​ពី​ ប្រទេស​បារាំង​មក​ធ្វើ​​ទស្សនកិច្ច​ក្នុង​អង្គការ​​នេះ ថែម​ទាំង​បាន​បាន​ជជែក​សំណេះ​សំណាល​​ជាមួយ​និស្សិត​ និង​គ្រូ​បណ្ដុះបណ្ដាល​ជំនាញ​ទាំង​នោះ​ថែម​ទៀត​ផង។
លោក Martin Hirsch និយាយ​ថា ​លោក​ពិត​ជា​កោត​សរសើរ​ចំពោះ​ការងារ​របស់​អង្គការ​មួយ​នេះ ដែល​បាន​រួម​ចំណែក ជួយ​និស្សិត​ក្រីក្រ​កម្ពុជា​​តាម​រយៈ​ការ​ផ្តល់​ការ​បណ្តុះ​បណ្តាល​មុខ​ ជំនាញ​ប្រកប​ដោយ​គុណភាព ដើម្បី​អាច​ឲ្យ​ពួកគេ​មាន​ឃ្លាត​​ឆ្ងាយ​ពី​ភាព​ក្រីក្រ និង​កសាង​ជីវភាព និង​អនាគត​កាន់​តែ​ប្រសើរ​ទៅ​ថ្ងៃ​អនាគត។
Passerelles Numeriques Cambodia ជា​អង្គការ​ក្រៅ​រដ្ឋាភិបាល​មួយ​ដែល​ផ្ដោត​លើ​ការ​បណ្ដុះ​បណ្ដាល​ការ​សិក្សា ​លើ​មុខ​ជំនាញ​ព័ត៌មានវិទ្យា​ចំនួន​ពីរ​គឺ​ ជំនាញ​​គ្រប់គ្រង​បណ្ដាញ Systems and Network Administrator (SNA) និង​​ជំនាញ​សរសេរ​កម្មវិធី​លើ​គេហទំព័រ Web Programmer​។
ស្ថិត​ក្នុង​គោល​ដៅ​កាត់​បន្ថយ​ភាព​ក្រីក្រ ​និង​បង្កើត​ឱកាស​ការងារ​ដល់​យុវវ័យ​កម្ពុជា តាម​រយៈ​សកម្មភាព​អប់រំ​ ​អង្គការ  PN ចាប់​តាំង​ពី​បង្កើត​ដំបូង​នៅ​ឆ្នាំ ២០០៥ រហូត​មក​ទល់​បច្ចុប្បន្ន​អង្គការ​បាន​បណ្ដុះបណ្ដាល​សិស្ស​និស្សិត​បាន​ចំនួន ៤៥៨ នាក់ ហើយ​សិស្ស​និស្សិត​មួយ​ចំនួន​ធំ​ក៏​កំពុង​តែ​ធ្វើ​កម្មសិក្សា និង​បម្រើ​ការងារ​នៅ​តាម​បណ្ដា​ក្រុមហ៊ុន​ជា​ដៃគូ​ជាង ១៧០ ក្រុមហ៊ុន​ផង​ដែរ៕

Friday, May 31, 2013

អៃយ៉ា​! ​Coca-Cola កំប៉ុង​ថ្មី​អាច​កាច់​ចែក​គ្នា​ជា២​ បាន​​​​ទៀត! Trackback

ថ្មី ​ៗ​នេះ​ក្រុម​ហ៊ុន​ Coca-Cola ​បាន​បង្កើត​គំនិត​ថ្មី​ទាក់​ទង​នឹង​កំប៉ុង​របស់​ខ្លួន​។ បើ​អ្នក​ញ៉ាំ​ Coca-Cola​ កំប៉ុង​ ហើយ​ចង់​ចែក​រំលែក​ជាមួយ​អ្នក​ដែល​ខ្លួន​ស្រឡាញ់​ ឬ​មិត្ត​ភក្តិ​ អ្នក​ប្រហែល​ជា​មិន​​ពិបាក​ព្រោះ​អ្នក​មាន​តែ​មួយ​កំប៉ុង​​ដួច​មុន​ទៀត​ទេ។ ពេល​នេះ​អ្នក​​អាច​ចែក​រំលែក​ Coca-Cola​ កំប៉ុង​ជាមួយ​មិត្ត​ភក្តិ​បាន​យ៉ាង​ងាយ​ ដោយ​សារ​តែ​ក្រុម​ហ៊ុន​ Coca-Cola​ បាន​បង្កើត​កំប៉ុង​ថ្មី​គឺ ​អាច​កាច់​ជា​២​បាន​​គ្រាន់​តែ​មួល​បន្តិច​ប៉ុណ្ណោះ។
គំនិត​ច្នៃ​ប្រឌិត​ ខាង​លើ​​គឺ​ជា​ គំនិត​ដើម​របស់​ក្រុមហ៊ុន​ផ្សាយ​ពាណិជ្ជកម្ម​ Ogilvy & Mather ​ដែល​​មាន​ការិយាល័យ​​នៅសិង្ហបុរី និង​បារាំង។ ​ក្រុមហ៊ុន​នេះ​ចង់​បង្កើត​ឡើង​នៅ​អ្វី​ដែល​ថ្មី​ និង​អាច​ទៅ​រួច។ ​ទោះ​​ជា​យ៉ាង​ណា​ ក្រុមហ៊ុន​ Coca-Cola ​​មិន​បាន​បញ្ជាក់​ថា ​នោះ​គឺ​ជា​គម្រោង​ផលិតផល​ពិត​របស់​ខ្លួន​ឬ​ យ៉ាង​ណា​ទេ។
ខាង​ក្រោម​ នេះ​ អ្នក​នឹង​បាន​ឃើញ​កំប៉ុង​ដ៏​វ័យ​ឆ្លាត​ថ្មី​របស់​ Coca-Cola​ ដែល​អ្នក​អាច​ញ៉ាំ​បាន​២​នាក់​ ក្នុង​កំប៉ុង​តែ​មួយ។ ចង់​ដឹង​ ចុច​លើ​វីដេអូ​ខាង​ក្រោម​ ដើម្បី​ដឹង​កាន់​តែ​ច្បាស់​៖
ចុះ​អ្នក​ចង់​ឲ្យ​ក្រុមហ៊ុន​ Coca-Cola ផលិត​កំប៉ុង​ថ្មី​នេះ​ដែរ​ឬ​អត់?

កុមារ​ពិការ​កម្ពុជាត្រូវ​បានលើក​ទឹក​ចិត្ត​​ពី​​លោក​ Nick Vujicic Trackback

កុមារកម្ពុជាមួយ ​រូបដែល​ពិការ​ដៃ​ជើង​​បាន​​ទទួល​ការ​គាំ​ទ្រ និង​លើក​ទឺក​ចិត្ត​​​ដោយ​ផ្ទាល់​ ពី​​វាគ្មិន​​ពិការ​ដៃជើង​ដ៏​ល្បី​ល្បាយ​ទូទាំង​ពិភពលោក ​គឺ​​លោក​ Nick Vujicic។ ​នេះ​បើតាម​រយៈ​រូប​ភាព​មួយ​សន្លឹក​ ដែល​ត្រូវ​បាន​បង្ហោះ​នៅ​លើ​​បណ្ដាញ​សង្គម Facebook កាល​ពី​ព្រឹក​មិញ។
​កុមារី​​ ស៊ិន ស្រីហង់ បច្ចុប្បន្ន​កំពុង​រៀន​ថ្នាក់​ទី៤​ និង​ទទួល​​បាន​ចំណាត់​ថ្នាក់​លេខ​មួយ​រាល់​ខែ​ រស់​នៅ​ឯ​ខេត្ត​បាត់​ដំបង។
បើ ​យោង​តាម​គណនី​ khmer Author chanbo keo នៅ​លើ​ Facebook កុមារី​អភព្វ​រូប​នេះ​កើត​នៅ​ថ្ងៃ​ទី​១០ ខែ​មករា​ ឆ្នាំ​២០០២​ នៅ​ភូមិ​ ស៊ុង​១​ ឃុំ​ស៊ុង​ ស្រុក​សំឡូត​ ខេត្ត​បាត់​ដំបង។ ​តែ​ប្រភព​ព័ត៌មាន​មិន​បាន​បញ្ជាក់​ថា​លោក​ Nick Vujicic និង​កុមារី  ស៊ិន​ ស្រីហង់​ ជួប​គ្នា​កាល​ពី​ពេល​ណា​ ឬ​នៅ​កន្លែង​ណា​នោះ​ទេ។
កុមារី  ស៊ិន​ ស្រីហង់​​ ជា​កូន​ស្រី​ទី​២​ ក្នុង​ចំណោម​កូន​ទាំង​ពីរ​នាក់​ របស់​លោក​ ខឹម​ ផល្លា​ អាយុ​៥១​ ឆ្នាំ​ និង​ម្តាយ​ឈ្មោះ​ ឈិន​ ឈុនលី​ អាយុ​៤៨​ឆ្នាំ​ មាន​មុខ​របរ​ជា​កសិករ។
​កាល​ពី​សប្ដាហ៍​មុន​លោក​​ Nick Vujicic​ បាន​​ធ្វើ​ឲ្យ​​​​ព្រឹត្តិការណ៍​​មួយ​​នៅ​កោះ​ពេជ្រ​ ក្លាយ​ជា​​ព្រឹត្តិការណ៍​ដ៏​វិសេស​វិសាល​ និង​មិន​អាច​បំភ្លេច​បាន​​សម្រាប់​អ្នក​ចូល​រួម​ ព្រោះ​លោក​បាន​ផ្តល់​នូវ​ទស្សនៈ​ និង​គន្លឹះ​ល្អ​ៗ​ជាច្រើន​ដល់​យុវជន​កម្ពុជា៕

Wednesday, May 29, 2013

វត្ត​បូព៌​អាយុ​ជិត​ ៣០០​ឆ្នាំ​​​​ Trackback

ស្ថិត​ក្នុង​ទឹក​ដី​​​​ខេត្ត​សៀមរាប ​​​មើល​ជញ្ជាំង​ខាង​ក្រៅ​ នៃ​​​​​ព្រះ​វិហារ​វត្ត​បូព៌​​​​ មាន​សភាព​ទ្រុឌទ្រោម​​​បន្តិច​ ដោយ​សារ​តែ​​​​ព្រះវិហារ​មួយ​នេះ ​មាន​អាយុ​កាល​ជិត​ ៣០០​ឆ្នាំ​ទៅ​ហើយ​។ ទោះ​ជា​យ៉ាង​​នេះ​ក្ដី ​​​​ទាំង​​ភ្ញៀវទេសចរ​​ជាតិ​ និង​អន្តរជាតិ​ ​មិន​ដែល​​​រំលង​​ព្រះវិហារ​នេះ​ឡើយ​ ពោល​គឺ​គេ​​ចូល​​​ទស្សនាមិនលស់​ថ្ងៃ​ទេ។
ព្រះវិហារ សាលាឆាន់ វត្ត​បូព៌​ បាន​កសាង​ឡើង​ក្នុង​កំឡុង​សតវត្ស​ទី​១៩។​ ​​ផ្នែក​ខ្លះ​នៃ​ព្រះវិហារ​​​បាន​ប្រេះ​​បែក ​និង​ទ្រុឌ​ទ្រោម​ជាច្រើនកន្លែង ហើយ​ចេតិយ​មួយ​ចំនួន​ក្នុងវត្តក៏​មាន​អាយុ​ប្រហាក់​ប្រហែល​នឹង​ព្រះវិហារដែរ ​ហើយ​មាន​​​​ចេតិយ​ខ្លះ​បាក់​បែក​កំពូល​អស់​នៅ​សល់​តែ​ខឿន​​ប៉ុណ្ណោះ។
វត្ត​បូព៌​​ មាន​ទីតាំង​នៅ​ទិស​​ខាង​កើត​​ ​នៃ​ស្ទឹង​សៀម​រាប​ ស្ថិត​តាម​បណ្ដោយ​​​ផ្លូវ​សម្តេច​ទេព​វង្ស។
ព្រះវិហារវត្តបូព៌

សាលាឆាន់ វត្តបូព៌

ចង់​ប្រើ Khmer Unicode លើ Photoshop មានអី​ពិបាក! Trackback

កន្លង ​ទៅ​នេះ មាន​ប្រិយមិត្ត​ជា​ច្រើន​មាន​ចម្ងល់​ និង​បាន​សាកសួរ​ជុំវិញ​ការ​ប្រើអក្សរ​ខ្មែរ Khmer Unicode នៅ​លើ Photoshop។ ជា​ការ​ការ​ឆ្លើយតប​តាម​សំណូម​ពរ​ ដូច្នេះ​នៅ​ទំព័រ​នេះ​ Sabay នឹង​លើ​ក​ពី​វិធីសាស្រ្ត​ក្នុង​ការ​​ប្រើប្រាស់​ពុម្ព​អក្សរ Khmer Unicode ទៅ​លើ​កម្មវិធី Photoshop មក​ធ្វើ​ការ​បង្ហាញ​ជូន​ដូច​ត​ទៅ។
ដើម្បី ​វាយ Khmer Unicode នៅ​លើ Photoshop ពេញ​ដៃ​ពេញ​ជើង ត្រូវ​ដំឡើង​ពុម្ព​អក្សរ​ខ្មែរ​យូនីកូដ​ដែល​ចាប់​ផ្ដើម​ដោយ KH ឬ Nida ជា​មុន​សិន។
តែ​ប្រសិន​ពុំ​ទាន់​មាន​ទេ ប្រិយមិត្ត​អាច​ទាញ​យក​បាន​ក្នុង​ទំហំ​ត្រឹមតែ 4.48MB ប៉ុណ្ណោះ។ ដើម្បី​ទាញ​យក សូមចុច​ត្រង់​នេះ …
+ របៀប​ដំឡើង៖
  • - ក្រោយ​ពី​ទាញ​យក​រួច ត្រូវ​ដំឡើង font ទាំង​នោះ​ដោយ​ចុច mouse ស្ដាំ​រួច​រើស​យក​ពាក្យ​ថា Install ឬ​មាន​វិធី​ម្យ៉ាង​ទៀត​ដោយ​ចម្លង (copy) ឯកសារ (font) ទាំង​អស់​​នោះ​ទៅ​ទុក​ក្នុង “C:\Windows\Fonts”។
  • - បន្ទាប់​ពី​បាន​ធ្វើ​តាម​ជំហាន​ខាង​លើ​ហើយ សូម​បើក​កម្មវិធី Photoshop ឡើង រួច​សាកល្បង​វាយ​បញ្ចូល​អក្សរ​ដោយ​រើស​យក​ឈ្មោះ font ដែល​បាន​ដំឡើង​នោះ។
  • ដោយ​ឡែក​សម្រាប់​កម្មវិធី Adobe Photoshop CS 6 វិញ​ពុំ​ចាំបាច់​ធ្វើ​ដូច្នោះ​ឡើយ គឺ​​គ្រាន់​តែ​ចុច​ទៅ​លើ​​ម៉ឺនុយ Edit -> Preference -> Type រួច​ជ្រើស​យក Middle Eastern ជំនួស​ឱ្យ East Asian វិញជា​ការ​ស្រេច​។
ប្រិយមិត្ត​អាច​សាកល្បង​ តើ​ជោគជ័យ​ដែរ​ឬ​យ៉ាង​ណា? បើ​មិនជោគជ័យ​ អាច​សាកសួរ​មក​ Sabay បន្ថែម​ទៀត។
នៅ​មាន​គន្លឹះ​ខ្លីៗ​ទាក់ទង​នឹង​ការប្រើប្រាស់​កុំព្យូទ័រ ក៏​ដូច​ជា​ទូរសព្ទ​ជា​ច្រើន​ទៀត ចុច​ត្រង់​នេះ​ ដើម្បីស្វែង​យល់បន្ថែម​ទៀត …

ដឹង​ទេ​ស្ថាបនិក Yahoo! ជា​ជន​ជាតិ​អ្វី? Trackback

ក្រុមហ៊ុន ​ល្បីៗ​លើ​​ពិភព​លោក ភាគ​ច្រើន​បង្កើត​ឡើង​ដោយ​ជនជាតិ​ស្បែក​ស​ដូចជា​អាមេរិក និង​អឺរ៉ុប​​ និង​មិន​សូវ​មាន​ជន​ជាតិ​អាស៊ី​ស្បែក​លឿង​នោះទេ។ ចុះ​ចំណែក Yahoo វិញ​មាន​ស្ថាបនិក​ជា​ជនជាតិ​អ្វី​ដែរ? ចម្ងល់​​​នេះ​​​នឹង​លាត​ត្រដាង​ជូន​ប្រិយមិត្ត​​ឲ្យ​ដឹង​​តាម Sabay ដូច​ខាង​ក្រោម៖
ពាក់​វ៉ែនតា ​ក្នុង​ទឹក​មុខ​ញញឹម​​ស្រស់​ស្រាយ​ លោក Jerry Yang ជា​ជនជាតិ​​អាមេរិក​ ប៉ុន្តែ​ដើម​កំណើត​តៃវ៉ាន់។ លោក​កើត​នៅ​ថ្ងៃ​ទី៦ ខែ វិច្ឆិកា ឆ្នាំ​១៩៦៨។ បុរស​អាយុ ៤៤ឆ្នាំ​រូប​នេះ គឺ​ជា​អ្នក​ជំនួញ​លើ​ប្រព័ន្ធ Internet និង​ជា​អតីត​នាយក​ប្រតិបត្តិ​របស់ Yahoo ផង​ដែរ។
រូប​លោក​ និង​ដៃគូ​ស្ថាបនិក​របស់​លោកគឺ David Filo (បច្ចុប្បន្ន​ជា​ប្រធាន Yahoo) បាន​បង្កើត Yahoo! នៅ​​​ថ្ងៃ​ទី​១ ខែ​មីនា ឆ្នាំ​១៩៩៥។
ជីវិត និង ការសិក្សា៖
Yang កើត​លើ​កោះ​តៃវ៉ាន់​នៅ​ថ្ងៃ​ទី​៦ ខែ​វិច្ឆិកា ឆ្នាំ១៩៦៨។ ពេល​មាន​អាយុ ១០ឆ្នាំ​ លោក​បាន​ផ្លាស់​ទៅរស់​នៅ​ក្នុង​ទី​ក្រុង​​ San Jose រដ្ឋ California ជា​មួយ​ម្ដាយ និង​ប្អូន​ប្រុស​របស់​លោក។ នៅ​អាមេរិក​ដំបូង​ ​លោក​ចេះ​តែ​ពាក្យ​អង់គ្លេស​មួយ​ម៉ាត់​គត់​រហូត​ដល់​រយៈ​ពេល ៣ឆ្នាំ​​ ទើប​ភាសា​អង់គ្លេស​របស់​លោកអាច​​និយាយ​បាន​ស្ទាត់​ជំនាញ រួច​គាត់​បាន​ផ្លាស់​ទៅ​សិក្សា​ថ្នាក់​ភាសា​អង់គ្លេស​ជាន់​ខ្ពស់ Advance Placement ។
​លោក​បាន​បញ្ចប់​អនុវិទ្យាល័យ Sierranmont , ​វិទ្យាល័យ Piedmont Hills បន្ទាប់​មក​​រៀន​បរិញ្ញាបត្រ និង​អនុបណ្ឌិត​​ផ្នែក​វិស្វករ​អគ្គិសនី​នៃ​សាកលវិទ្យាល័យ Stanford។
ការងារ៖
ខណៈ​ពេល​រៀន​នៅ Stanford លោក Yang និង David Filo បាន​បង្កើត​គេហទំព័រ Internet មួយ​ឈ្មោះ Jerry and Dave’s Guide ទៅ​កាន់ WWW ក្នុង ​ឆ្នាំ​១៩៩៤។ ក្រោយ​មក​​បាន​ដាក់​ឈ្មោះ Yahoo! ក្នុង​ឆ្នាំ​១៩៩៥ ​​ភាព​ល្បីល្បាញ​របស់​ Yahoo! ក៏​ចាប់​ផ្ដើម​​មាន​តាំង​ពី​ពេល​នោះ​មក។
ដំណែង CEO របស់ Yahoo!
លោក Yang បាន​ធ្វើ​ជា​នាយក​ប្រតិបត្តិ (CEO) របស់ Yahoo! ក្នុង​ចន្លោះ​ខែមិថុនា ឆ្នាំ​២០០៧ ដល់​ខែ​មករា ឆ្នាំ​២០០៩ ប៉ុន្តែ​​គាត់​ត្រូវ​វិនិយោគិន​​ជា​ច្រើន​បាន​រិះគន់​យ៉ាង​ខ្លាំង​លើ​​ការ​ មិន​បង្កើន​ប្រាក់​ចំណូល និង​តម្លៃ​ភាគហ៊ុន។ Yahoo! បាន​តែង​តាំង​លោក​ស្រី Carol Bartz ជា CEO ថ្មី​នៅ​ថ្ងៃ​ទី​១៣ ខែ​មករា ឆ្នាំ​២០០៩។ ប្រាំ​ថ្ងៃ​ក្រោយ​មក​លោក Yang បាន​ប្រកាស​​លាលែង​​នៅ​ថ្ងៃ​ទី​១៧ ខែ​មករា ឆ្នាំ ២០០៩។ ក្រៅ​ពី​នេះ​ លោក​ក៏​ធ្លាប់​ធ្វើ​ជា​​ក្រុមប្រឹក្សា​នាយក​របស់​ក្រុមហ៊ុន​លក់​ឧបករណ៍ Network CISCO ផង​ដែរ ​តែ​មិន​បាន​បញ្ជាក់​ពី​ពេល​វេលានោះ​ទេ។
បន្ត​តាមដាន ជីវប្រវត្តិ​សង្ខេប​​របស់​បុគ្គល​បច្ចេកវិទ្យា​អន្តរជាតិ ​ស្នាដៃ​បុគ្គល​បច្ចេកវិទ្យា​ក្នុង​ស្រុក និង​ស្ថាប័ន​ល្បីៗ​ដទៃ​ទៀត

វត្តមាន​កម្ពុជា​ ក្នុង​នាម​ជា​សមាជិក​សហភាព​ទូរគមនាគមន៍​អន្តរជាតិ Trackback

កម្ពុជា​ដែល​ជា​សមាជិក​សហភាព​ទូរគមនាគមន៍​អន្តរជាតិ (ITU) ទើប​តែ​ចូលរួម​ប្រារព្ធ​ខួប​លើក​ទី ១៤៨ នៃ​សហភាព​ទូរគមនាគមន៍​អន្តរជាតិ និង​ទិវា​ពិភពលោក​សង្គម​ព័ត៌មានវិទ្យា​និង​ទូរគមនាគមន៍ ១៧ ឧសភា កាលពី​ពេល​ថ្មីៗ​នេះ។
តើ ​សហភាព​ទូរគមនាគមន៍​អន្តរជាតិ​មាន​ប្រវត្តិ​កកើត​ឡើង​បែ​បណា ហើយ​កម្ពុជា​បាន​ក្លាយ​ជា​សមាជិក​របស់​សហភាព​នេះ​យ៉ាង​ដូចម្ដេច? សូម​បន្ត​តាម​ដាន​ប្រវត្តិ ដែល​ Sabay បង្ហាញ​ដូច​ខាង​ក្រោម​នេះ។
កើត​ដំបូង​មាន​តែ​ ២០ ប្រទេស​ប៉ុណ្ណោះ​ជា​សមាជិក
សហភាព ​ទូរគមនាគមន៍​អន្តរជាតិ International Telecommunication Union (ITU) គឺ​ជា​ភ្នាក់ងារ​ពិសេស​មួយ​ឈាន​មុខ​គេ​របស់​អង្គការ​សហប្រជាជាតិ UN ដែល​ទទួលខុសត្រូវ​លើ​កិច្ចការ​បច្ចេកវិទ្យា​គមនាគមន៍​និង​ព័ត៌មាន​ (ICT)។
សហភាព ​ទូរគមនាគមន៍​អន្តរជាតិ (ITU) បាន​ចាប់​បដិសន្ធិ​ឡើង​នៅ​ថ្ងៃទី១៧ ខែ​ឧសភា ឆ្នាំ១៨៦៥ នៅ​ទីក្រុង​ប៉ារីស ប្រទេស​បារាំង ដោយ​សមាជិក​ដំបូង​មាន​ចំនួន​ត្រឹម​តែ ២០ ប្រទេស​ប៉ុណ្ណោះ និង​មាន​ឈ្មោះ​ពេញ​ហៅថា «សហភាព​ទូរលេខ​អន្តរជាតិ (International Telegraph Union)។
ចាប់​តាំង​ពី​ឆ្នាំ១៩៣២ ត​រៀង​មក ទី​ភ្នាក់ងារ​នេះ​ក៏​បាន​ប្តូរ​ឈ្មោះ​ជា​សហភាព​ទូរគមនាគមន៍​អន្តរជាតិ (International Telecommunication Union) ដែល​មាន​ទីស្នាក់ការ​កណ្ដាល​​នៅ​ទីក្រុង​ហ្សឺណែវ ប្រទេស​ស្វីស និង​មាន​ការិយាល័យ​តំណាង​ចំនួន៥ ប្រចាំ​តាម​តំបន់​នៅ​ជុំវិញ​ពិភពលោក​ដែល​ក្នុង​នោះ​រួមមាន៖
១. តំបន់​អាហ្វ្រិក (នៅ​ទីក្រុង Addis Ababa, ប្រទេស​អេត្យូពី)
២. តំបន់​អាមេរិក (នៅ​ទីក្រុង Brasilia, ប្រទេស​ប្រេស៊ីល)
៣.តំបន់​អារ៉ាប់​ (នៅ​ទីក្រុង Cairo, ប្រទេស​អេហ្ស៊ីប)
៤. តំបន់​អាស៊ី​ប៉ាស៊ីហ្វិក (នៅ​ទីក្រុង​បាងកក, ប្រទេស​ថៃឡង់ដ៍)
៥.តំបន់​អឺរុប​និង​បណ្តា​រដ្ឋឯករាជ្យ Commonweal ”CIS”(នៅ​ទីក្រុង​ម៉ូស្គូ, ប្រទេស​រុស្ស៊ី)
ការ​ពង្រីក​វិសាលភាព​ និង​ការ​បង្កើនចំនួន​សមាជិក
សហភាព ​ទូរគមនាគមន៍​អន្តរជាតិ (ITU) មាន​ការ​រីកចម្រើន​ជា​បន្ត​បន្ទាប់​ឥត​ឈប់ឈរ ដោយ​បច្ចុប្បន្ន ភ្នាក់ងារ​នេះ​មាន​សមាជិក រួមមាន​រដ្ឋ​ជា​សមាជិក​​ចំនួន​១៩៣​ប្រទេស​​​​ និង​ផ្នែកឯកជន​ចំនួន​ជាង​៧០០​ស្ថាប័ន ។
សហភាព​ទូរគមនាគមន៍​អន្តរជាតិ (ITU) បាន​ដើរតួ​នាទី​យ៉ាង​​សកម្ម​ក្នុង​ការ​ផ្សារភ្ជាប់​ទំនាក់ទំនង​ជា​សាកល រវាង​រដ្ឋាភិបាល​និង​ផ្នែក​ឯក​ជន​លើ​ការ​អភិវឌ្ឍ​បណ្ដាញ​និង​សេវា​​ដោយ​ឈរ​ លើ​ចក្ខុវិស័យ​របស់​ខ្លួន​គឺ​«ប្ដេជ្ញា​តភ្ជាប់​ទំនាក់​ទំនង​ពិភពលោក​ ទាំងមូល» ។
រចនា​សម្ព័ន្ធ​របស់ ITU រួមមាន​អង្គភាព​ស្នូល​ចំនួន​៣ ​គឺ ៖
១.​ការិយាល័យ​វិទ្យុ​គមនាគមន៍ (ITU-R)
២.ការិយាល័យ​ស្តង់ដារនីយកម្ម​ទូរគមនាគមន៍ ​(​ITU-T)
៣.ការិយាល័យ​អភិវឌ្ឍន៍​ទូរគមនាគមន៍​ (ITU-D)
វត្តមាន​កម្ពុជា ជា​សមាជិក​របស់​សហភាព​ទូរគមនាគមន៍​អន្តរជាតិ
ព្រះរាជាណាចក្រ ​កម្ពុជា បាន​ចូល​ជា​សមាជិក​​ពេញ​សិទ្ធិ​របស់​សហភាព​ទូរគមនាគមន៍​អន្តរជាតិ ITU នេះ​នៅ​ថ្ងៃ​ទី​១០ ​ខែ​មេសា ឆ្នាំ១៩៥២។ កម្ពុជា​បាន​បំពេញ​តួនាទី​របស់​ខ្លួន ក្នុង​ឋានៈ​ជា​រដ្ឋ​សមាជិក​បាន​យ៉ាងសកម្ម។ ជាក់ស្ដែង​កាល​ពី​ដើមខែ​ឧសភា​កន្លង​ទៅ​ថ្មី​នេះៗ កម្ពុជា​បាន​ទទួល​ធ្វើ​ជា​ម្ចាស់ផ្ទះ​ប្រកប​ដោយ​ជោគជ័យ​កិច្ច​ប្រជុំ​ត្រៀម​ ថ្នាក់​តំបន់​អាស៊ី-ប៉ាស៊ីហ្វិក សម្រាប់​សន្និសីទ​ពិភពលោក​ WTDC-14 នៅ​ប្រទេស​អេហ្ស៊ីបឆ្នាំក្រោយ។ ចំពោះ​កិច្ចសហប្រតិបត្តិការ​អភិវឌ្ឍន៍​ជាមួយ​កម្ពុជា​ក្នុងរយៈ​កាល ២០ឆ្នាំ (១៩៩៣​ដល់​ឆ្នាំ២០១៣) ITU បាន​ជួយ​ឧបត្ថម្ភ​គាំទ្រ​ដល់​កម្ពុជា​យ៉ាង​ច្រើន​សន្ធឹកសន្ធាប់​ទាំង​​ ស្មារតី​និង​សម្ភារៈ ក្នុង​ការ​កសាង​សមត្ថភាព​ធនធាន​មនុស្ស, ជំនួយ​ផ្នែក​បច្ចេកទេស រួម​ទាំង​ការ​ជួយ​រៀប​ចំ​លិខិត​បទដ្ឋាន​គតិយុត្តិ​ពាក់ព័ន្ធ​នឹង​វិស័យ ICT ផង​ដែរ ។
អត្ថន័យ​នៃ​ទិវា​ពិភពលោក​សង្គម​ព័ត៌មាន​និង​ទូរគមនាគមន៍ ១៧ ឧសភា
ក្នុង ​ខែ​វិច្ឆិកា​ឆ្នាំ២០០៥ កិច្ច​ប្រជុំ​កំពូល​ពិភពលោក​ស្តី​ពី​សង្គម​ព័ត៌មាន​ (WSIS) បាន​ដាក់​សំណើ​​ទៅ​មហាសន្និបាត​អង្គការ​សហប្រជាជាតិ ដើម្បី​ប្រកាស​យក​ថ្ងៃ១៧ ឧសភា នៅ​រៀងរាល់​ឆ្នាំ​ជា​ទិវា​ពិភពលោក​សង្គម​ព័ត៌មាន និង​ទូរគមនាគមន៍​ចំ​ថ្ងៃ​ចុះ​ហត្ថ​លេខា​លើក​ដំបូង​លើ​អនុសញ្ញា​តេឡេក្រាម​ អន្តរជាតិ និង​ការ​ចាប់​បដិសន្ធិ​របស់​សហភាព​​ទូរគមនាគមន៍​​អន្តរជាតិ (ITU) ១៧ ឧសភា ១៨៦៥​ តែ​ម្តង ។
មួយ​ឆ្នាំ​ក្រោយ​មក ពោល​គឺ​នៅ​ក្នុង​ខែ​វិច្ឆិកា ​ឆ្នាំ២០០៦ នា​ទីក្រុង​ Antalya ប្រទេស​ទួកគី សន្និសីទ​កំពូល​របស់ ITU​ បាន​អនុម័ត​សម្រេច​យក​ថ្ងៃ​ទី១៧ ខែ​ឧសភា នៅ​រៀង​រាល់​ឆ្នាំ​ជា​ទិវា​ពិភពលោក​សង្គម​ព័ត៌មាន និង​ទូរគមនាគមន៍ ។
គោលបំណង ​នៃ​ទិវា​នេះ គឺ​ដើម្បី​ជួយ​លើក​កម្ពស់​ការ​យល់ដឹង​នូវ​លទ្ធភាព​ដែល​ថា ការ​ប្រើ​​ប្រាស់​អ៊ីនធឺណិត​និង​ព័ត៌មាន​ផ្សេង​ទៀត​មាន​ជា​អាទិ ​ប​ច្ចេ​ក​វិទ្យា​គមនាគមន៍​​និង​ព័ត៌មាន​អាច​ជួយ​ដល់​សង្គម​និង​សេដ្ឋកិច្ច​ ក៏​ដូច​ជា​វិធី​មួយ​ដើម្បី​កាត់​បន្ថយ​​គម្លាត​ឌីជីថល។ ជាក់ស្ដែង​ទិវា​ពិភព​លោក​សង្គម​ព័ត៌មាន និង​ទូរគមនាគមន៍​ឆ្នាំ​នេះ គឺ​ស្ថិត​ក្រោម​ប្រធាន​​បទ«ប​ច្ចេ​ក​វិទ្យា​គមនាគមន៍​និង​ព័ត៌មាន​និង​ការ​ធ្វើ​ឲ្យ​ប្រសើរ​ឡើងនូវ​សុវត្ថិភាព​​ចរាចរណ៍​ផ្លូវគោក»។
ប្រធានបទ ​នេះ​បាន​រំលេច​យ៉ាង​ច្បាស់​អំពី​តួនាទី​ដ៏​សំខាន់​នៃ​បច្ចេកវិទ្យា​ គមនាគមន៍​និង​ព័ត៌មាន​ក្នុង​ការ​រួម​ចំណែក​ធ្វើ​ឲ្យ​ប្រសើរ​ឡើង​នូវ​ សុវត្ថិភាព​ចរាចរណ៍។ តាម​រយៈ​ការ​ប្រារព្ធ​ទិវា​ពិភព​លោក​សង្គម​ព័ត៌មាន​​និង​ទូរគមនាគមន៍ ១៧ ឧសភា បាន​រួម​ចំណែក​លើក​កម្ពស់​ការ​យល់​​ដឹង​ដល់​សាធារណជន ពិសេស​អ្នកប្រើប្រាស់​ផ្លូ​វថ្នល់​ទាំងអស់​អំពី​គ្រោះថ្នាក់​ចរាចរណ៍​ដោយ​ សារ​ការ​បាត់​ម្ចាស់​ការ​កើត​ចេញពី​ឥរិយាបថ​ខុស​ឆ្គង​របស់​អ្នក​បើក​បរ ដោយ​ប្រើប្រាស់​រាល់​ឧបករណ៍ ICT ដូចជា​ទូរសព្ទដៃ ឬ ឧបករណ៍​អេឡិចត្រូនិក​ផ្សេងៗ​ទៀត​ជា​ដើម៕
ដើម្បី​បន្ត​អាន​ប្រវត្តិ​ស្ថាប័ន​បច្ចេកវិទ្យា​ផ្សេង​ទៀត សូម​ចុចត្រង់នេះ…