ល្អប្រណីត

សម្តេចហ៊ុន សែនៈ ទំនាក់ទំនងកម្ពុជា-ចិន រឹងមាំដូចស្ពានឆ្លងកាត់ទន្លេទាំងអស់នៅកម្ពុជា

ភ្នំពេញ ៖ ប្រមុខ រាជរដ្ឋាភិបាលកម្ពុជា សម្តេចតេជោ ហ៊ុន សែន បានប្រកាស នៅថ្ងៃទី២៥ ខែមីនា ឆ្នាំ២០១៣ថា ទំនាក់ ទំនងមិត្តភាព រវាងប្រទេសកម្ពុជា និងប្រទេសចិន នឹងពិតជាមានភាពរឹងមាំ ដូចទៅនឹងស្ពានទាំងអស់ នៅក្នុងទឹកកម្ពុជា។ សម្តេច តេជោ ហ៊ុន សែន បានមានប្រសាសន៍ ក្នុងពិធីបើកការដ្ឋាន សាងសង់ស្ពានកោះធំ ស្ថិតក្នុងស្រុកកោះធំ ខេត្ដ កណ្ដាល កាលពីព្រឹកថ្ងៃទី២៥ ខែមីនា ឆ្នាំ២០១៣ថា “ ខ្ញុំសង្ឃឹមថា ទំនាក់ទំនង រវាងកម្ពុជា-ចិន នឹងរឹងមាំ ដូចជា ស្ពាន បេតុង ឆ្លងកាត់ទន្លេទាំងអស់ របស់យើង….យើងបានសាកល្បងទំនាក់ទំនង ចាប់តាំងពី ព្រះករុណាព្រះបាទ សម្តេច ព្រះ នរោត្តម សីហនុ ជាមួយនឹងថ្នាក់ដឹកនាំចិន ដូចជា ប្រធានម៉ៅ និងនាយករដ្ឋមន្រ្តី ជូអេឡាយ ជាដើម”។ សម្តេចនាយករដ្ឋមន្រ្តី បន្តថា មកដល់បច្ចុប្បន្ននេះ ព្រះមហាក្សត្រកម្ពុជា ព្រះបាទ នរោត្តម សីហមុនី និងសម្តេចផ្ទាល់ នៅ តែបន្តទំនាក់ទំនង ជាមួយមេដឹកនាំរបស់ចិន ដ៏ស្អិតរមួតបន្តទៀត។ សម្តេចតេជោ បន្តថា “ជំនាន់មុននេះ ប្រធានាធិបតីចិន ហ៊ូ ជិនតាវ និងនាយករដ្ឋមន្រ្តី វ៉េន ជាវប៉ាវ ហើយបន្តមកជាមួយ លោកប្រធានាធិបតី ស៊ិន ជីងពីង និងនាយករដ្ឋមន្រ្តី នី គីជាំង ចំពោះខ្ញុំផ្ទាល់ មានតាំងពីប្រធានាធិបតី ហ្សាង ជីមីង និង នាយករដ្ឋមន្រ្តី លីភឹង ហើយបន្ទាប់ទៅ ហ្សាង ជីមីង និងជូង យូជីង ហើយខ្ញុំតាមរយៈ ឯកឧត្តម ផាន់ ក្វាងសៀ ក៏សូម ផ្ញើជូននូវការអរគុណ ជាមួយជំនួយឧបត្ថម្ភគាំទ្រ របស់មិត្តចិន ដែលបានផ្តល់ចំពោះព្រះរាជាណាចក្រកម្ពុជា”។ សម្តេចបានបន្ថែមថា ហេដ្ឋារចនាសម្ព័ន្ធទាំងអស់ នៅកម្ពុជា ដែលមានការរីកចម្រើនលូតលាស់ ដែលបានមកពីហិរញ្ញ ប្បទានរបស់មិត្តចិន និងប្រទេសជាដៃគូរពាក់ព័ន្ធនានា បានធ្វើឲ្យសេដ្ឋកិច្ចកម្ពុជា រីកចម្រើនខ្លាំង ក្នុងរយៈពេលជិត ២ ទសវត្សរ៍ ចុងក្រោយ បន្ទាប់ពីកម្ពុជា មានសន្តិភាពពេញលេញ។ សម្តេចមានការពេញចិត្ត ចំពោះទំនាក់ទំនង រវាងមិត្តចិន និងកម្ពុជា ដែលមានជាមួយគ្នា តាំងពីយូររហូតមកដល់បច្ចុប្បន្ន ។
ក្នុងជំនួបទ្វេភាគី ក្រៅកិច្ចប្រជុំកំពូលអាស៊ាន-ចិនកាលពីអំឡុង ខែវិច្ឆិកា ឆ្នាំ២០១២ ដែលបានធ្វើឡើង នៅរាជធានីភ្នំពេញ រវាងប្រមុខ រាជរដ្ឋាភិបាលកម្ពុជា សម្តេចតេជោ និងលោក វិន ជាបាវ នាយករដ្ឋមន្ត្រីចិន សម្តេចតេជោបានស្នើ ប្រទេសចិន បន្តផ្តល់ នូវជំនួយសម្បទាន ដល់កម្ពុជា និងបានស្នើសុំ ប្រទេសចិន ឲ្យបន្តកិច្ចសហប្រតិបត្តិការ ផ្នែកសេដ្ឋកិច្ច ប្រយោជន៍ ធ្វើយ៉ាងណា ឲ្យទំនាក់ទំនងពាណិជ្ជកម្ម និងវិនិយោគ រវាងប្រទេសទាំងពីរ បាន ៥ ពាន់លានដុល្លារ ក្នុងឆ្នាំ២០១៧ ៕