អស្ចារ្យ​ណាស់​សូម្បី​តែ​គេហទំព័រ​ YouTube ក៏​មាន​បក​ប្រែ​ភាសាខ្មែរ​ដែរ

YouTube ​ ជា​គេហទំព័រដ៏​ល្បីល្បាញ​​មួយ ដែល​មាន​ការ​ពេញ​និយម​គ្រប់​ស្រទាប់​វ័យ​ទាំង​អស់​ ព្រោះ​ថា​គេហទំព័រ​មួយ​​នេះ​បានប្រមូល​ផ្តុំ​ដោយ​​បទ​ចម្រៀង​ និង​​វីដេអូដ៏​មាន​ប្រយោជន៍​ជា​ច្រើន​សម្រាប់​ប្រិយមិត្ត​ទស្សនា​កម្សាន្ត​។ ​កាន់​តែ​ពិសេស និង​គួរ​ឲ្យ​ចាប់​អារម្មណ៍​ដោយថ្មីៗ​នេះ យុវជន​ខ្មែរ​មួយ​ក្រុម​បាន​បក​ប្រែ​​ភាសាជាតិ​របស់​ខ្មែរ​ ​នៅ​​លើ​​គេហទំព័រ​ដ៏​ល្បី​ល្បាញ​បំផុត​លើ​ពិភពលោក​មួយ​នេះ។

លោក​ ពេជ្រ វីរៈ ​ប្រធាន​ Google Business Group ភ្នំពេញ បាន​ឲ្យ​ដឹង​ថា​ ពិត​ណាស់​​ដែល​មាន​ការ​ការ​បក​ប្រែ​ភាសាជាតិ​ខ្មែរ​ នៅ​​លើ​គេហទំព័រ​កម្សាន្ត​ដ៏​ល្បី​ល្បាញ​បំផុត​របស់​ពិភពលោក​ YouTube កាល​ពី​ពេល​ថ្មីៗ​នេះ។
YouTube មាន​ការ​ពេញ​និយម​​បំផុត​ ព្រោះ​វា​ជា​​គេហទំព័រ​មួយ​ដែល​មាន​ប្រមូល​ផ្តុំ​ដោយវីដេអូ​​កម្សាន្ត​ដូចជា ​ចម្រៀង​ ភាពយន្ត​ និង​ឯកសារ​រាប់​លាន​ សម្រាប់​ឲ្យ​​ប្រិយមិត្ត​អាច​ចូល​ឆែក​កម្សាន្ត​បាន​យ៉ាង​រីករាយ​។ បន្ថែម​ពី​នោះ YouTube ត្រូវ​គេ​ចាត់​ទុក​ដូចជា​ម៉ាស៊ីន​ដែល​អាច​ដោះស្រាយ​​រាល់​ចម្ងល់​ទាំង​ឡាយ​​ បាន​យ៉ាង​មាន​ប្រសិទ្ធភាព។
លោក​បន្ត​ថា​ YouTube បាន​ដាក់​បញ្ចូល​​នូវ​ការ​បក​ប្រែ​ជា​ភាសាខ្មែរ​តាំង​ពី​ថ្ងៃ ច័ន្ទ​ សប្ដាហ៍​មុន​មក​ម៉្លេះ។ ដោយ​ហេតុ​ថា​មាន​ការ​សហការ​រវាង​ YouTube និង Google Translate ទើប​អាច​បក​ប្រែ​រាល់​អក្សរ​ដែល​រត់​នៅ​លើ​វីដេអូ​គេហទំព័រ​ YouTube នោះ។
លោក​ ពេជ្រ វីរៈ បាន​បន្ថែម​ថា​ សម្រាប់​លោក​គឺ​តែង​តែ​ជំរុញ​ជានិច្ច​ក្នុង​ការ​បកប្រែ​ភាសាខ្មែរ​ក្នុង​ Google Translate ឲ្យ​កាន់​តែ​លក្ខណៈ​ស្តង់ដាបន្ថែម​ទៀត ដោយ​​តែង​តែ​យក​ពេល​វេលា​ទៅ​បង្ហាត់​បង្រៀន​ការ​បក​ប្រែ​នៅ​តាម​ហាងកាហ្វេ , សាកល​វិទ្យាល័យ​ , អង្គការ​ ឫ ស្ថាប័ន​ផ្សេង​ៗ ដើម្បី​ឲ្យ​ការ​បក​ប្រែ​ជា​ភាសាខ្មែរ​​ត្រូវ​តាម​វេយ្យាករណ៍​ខ្មែរ និង ត្រឹម​ត្រូវ​តាម​ក្បួន​ខ្នាត។
ដូចនេះ​លោក​រំពឹង​ទុក​ថា រាល់ការ​​បក​ប្រែ​ទាំង​ឡាយ​មិន​ថា​នៅ​លើ​ Google Translate ឫ នៅ​លើ​គេហទំព័រ YouTube និង គេហទំព័រ​ផ្សេង​ៗ​ទេ​ សង្ឃឹម​ថា​នឹង​មាន​ការ​អភិវឌ្ឍ​បន្តិច​ម្តងៗ​រហូត​ទទួល​បាន​ជោគ​ជ័យ​និង​ផ្លូវការ។​
អាន​អត្ថបទ៖ Microsoft គ្រោង​បង្កើត​ប្រព័ន្ធ​បកប្រែ​ជា​ភាសា​ខ្មែរ​​មិន​ឲ្យ​ចាញ់ Google